من بير آنايام هر آناكيمي، كي اؤز اوشاغينين گله جه يي ني اوغورلو اولماسينا نايراندي. منده بو دونيانين قار باقارشيغيندا او شفقلي نارين گؤزلرده شيرين بير اوميد گؤرورم؛ او آرزيلارين آتا و آناسيندا آختارير. منه اوشاق چاغيندا دئيرديلركي: "معليم آتا و آنادان اوستوندو" سوندا ايضاح دئييب دئيرديلركي: "معلم دوشونجه، علم و هابئله گله جك باغشلايار؛ دوغورداندا بئله دير. اينديكي من بير آنايام، سيز عزيز معليم، كچميشلردن دوشوندوغوم ايستكلري سيز چاليشان گئجه ني گونوزه قاتان معليمدن ايسته ييرم: حؤرمتلي عزيز معليم: اونا اؤيره دين، ديقتلي اولسون، گؤيلرده كي اولدوزلارا و گونه، اوچان قوشلارا، يئرده گزن قوردلارا (جاناوارلارا)، قارشقانين زومار ييغما سينا. اونا اؤيردين اينامسيز (مذهب و ايدئولوژي و...) يوخدور، آما وطن سيز اينام آدرسسيز بير يولدور، اونا اؤيردين وطندن اوستون هئچ بير وارليق اولابيلمز، نييه كي هر بير وارليق وطنده اولمالي دير. اؤيره دين اودوزماقدان چوخ، اؤيرنسين اودوزماماغي و سئوينسين اوداندا. دئنن: هيچ واقت اؤزوندن چيخماسين. آما هر واخت اولدوغو شعورا گوونسين (ايفتخار ائتسين)، كيتاب اوخوماغي ياشاييشين بير عونصرو تك اولماسيني قولاغينا آسسين. منيم بالاما اؤيردين مكتب خانادا درسدن قالماسي، آلچاق يوللاردان قبول اولماسيندان اوستوندور. دئيين: تام دانشيقلاري و فيكرلري ائشيدسين، سئچيب، ييغيب، گؤتورسون، اؤيردين چالشماغينان بئش قيران قازانماسي، آلچاق يوللاردان چوخ تاپماسيندان اؤنملي دير. اگر دئيه بيلسه ز، دئيين وارلي اولسون هم پارادان هم دوشونجه دن. اونا اؤيردين اؤز شعورنا و فيكرينه قيمت قويسون آما اورك ايستكلرينه قيمت قويماق اولا بيلمز. كچميشيني اؤيردين، اؤيردين كئچميش آتا بابالارين باشينا نه لر گلميش، نه لري سهو ائديبلر، نه لر قازانيبلار، نه لر اودوزوبلار. حؤرمتلي معليم، اوشاغيما كيم اولدوغونو اؤيردين نئيه كي اؤزونو تانيان اؤزگه لَرَ نوكر اولماز. دئيين كچميشده دوشمنين قورقولاريندان، دوستلاري بوراخيب يادلارا دايانماقدان. يييه سيز- يئرسيز اينانماقلاردان، قارداش قارداشين قارشيسيندا دورماقدان، وطني بوراخيب اينام داشيماقدان و… اؤيردين علي حضرتلرين سؤزونوكي بويورور: كئچميشلر گله جه يين چيراغ باني دير. اوشاغيما گله جه يين شيرين و آجيلاريندان دئيين. او بيلمه لي ديركي اينسانلار فيكردن و الدن دوز اولا بيلرلر، آما اونلارين بير سيراسي آلچاق دوشونجه لي و بير سيراسي گؤزه ل دوشونجه لي اولابيلرلر. نئجه كي بوغدا اكين يئرينده بوغدادا اولابيلر هرزه اوت دا. اوشاغيما اؤيردين ميلي ايستكلر اوغروندا نه همه شه ليق دوشمان وار نه دوست. اونا اؤيردين يوموشاقلارينان يوموشاق اولسون و قولدورلارينان قولدور اولسون. اينانديغي يولا اينامي اولسون اگر دونيا اونون قارشيندا اولسادا. منيم بالامين عزيز معليمي، بيليرم بو مكتوب سيزي چوخلو يوردو اما سيزده منه حاق وئرين نييه كي ياشاديغيم يئرده دانيشديغيم ديلين يازيب پوزماسي ياساق دير. اونا اؤيردين بو يازيلار – كيتابلار اؤزگه لريندير. بوگون زوراكيليق حالدا اؤيره نير. اما دئيين: گئج تئز اؤز ديليميزده يازيب پوزاجاغيق. اينانديرين كي بو ايش اولاجاق. اونا اؤيردين اؤز ميلتينه اينامي اولسون، اوز قارداشلارينين سهولرينه گؤز يومسون. اونا اوركدن اؤيردين ائل گوجي، سئل گوجودور. دئيين: دوشمنلريني دوشمن تك تانيسين، اونلارين حيله لرين دوشونسون. اونا اينانديرين كي تورپاقدان هچ بيركيمسه يه پاي اولا بيلمز. دئيين: اينسانين خانيمي- اوشاغي- كيشي سي دونياسين دَييشسه باشقاسينا صاحيب اولا بيلر، اما وطن تورپاغي ائلدن گئديرسه نه يارادماق اولار نه اكمك اولار. بالاما اؤيردين هر بير كلمه سين اؤزگه ديله چئويرسه ائله بيلسين بير قاريش تورپاغين الدن وئريب. اونا اؤيردين همشه قاباقچيل اولسون، باشلاردان بير باش اوسته اولسون، ائلدن چوخ قاباغا دوشمه سين، اما ياتيب بو ياشايشين كروانيندان دالي قالماسين. اؤيردين ميلتينين اينانديغينا حؤرمت ائتسين و بيلسين كي هر زادي اله گتيرمك اوچون هزينه سين وئرمه لي دير. اونا تانيتديرين كئچميش ميللي قهرمانلارين تانيسين و اونلارين ايستكلرين و اينانجلارين بيلسين. اؤيردين اونلار اؤز شيرين جانلارين بيزيم گله جه ييميزين اوغروندا وئريبلر. دئيين: اونلارا بؤيوك حؤرمت دوشونسون، اونلارين قارشيسيندا ديز چؤكسون، اؤيردين قالميش يازارلار (كيتاب)، تيكيلميش عابده لر و هرنه كي كئچميشدن بو گونه قاليب اونون صاحيبي دير و اونلاري ساخلاماق اونون بؤرجودور. اونا اؤيردين قارقانين دانشيغي قاريلداماق دير، اؤزونه گؤره اوجا قلمه آغاج باشيندا يوواسي وار اونو قورويوب ساخلاماق اوچون جانيندان دا كئچر. دئيين: قيراغندا اولان گليشمه لردن (تحول لردن) گؤزو يومولو كئچمه سين ، دايانسين دوشونسون. اونا دئيين: خانيم لارا بؤيوك حؤرمت وئرسين نيه كي مدني اوشاقلار آنالار قوجاغيندا بؤيوروبلر… دئيين: گله جه يين آيدين اولماسي بالاجا قيزلارين دوشونجه لي اولماسيندان آسيلي دير. اؤيردين اونلار باشلاريني اؤيرتسه لرده، گؤزلرين و قولاقلارين آچيق ساخلامالي ديرلار. اونا دئيين هر بير شيئي، هر بير اينانجي يالنيز اؤزونه قدر حورمت وئرسين. اؤيردمه ليسينيز اطمينان تام اولا بيلمز؛ كركليدي آردينجا اعتماد سونرا كنترل اولا. اؤيردين هر بير اينساني او گون اولدوغو قدر اينانسين نييه كي اينسان اولا بيلر دئيشيلسين. اونا اؤيردين هميشه گؤزونون گوردوكلرينه، قولاغينين ائشيدديكلرينه سووال ائتسين و اونلارا جاواب وئرسين. اونا اؤيردين اينساني نوخدالييان تقليد (دوشونمه مكدن بير ايش يا فيكره ماليك اولا) ائتمك دير. اؤيردين وطنسيز اينام، هچ بير شي اولا بيلمز. وطنه اينانان وطنداشلارينين اينانديقلارينا حؤرمت ائده ر. دئيين: گله جك رؤياسيندا اوزمك شيرين اولسادا ياتماق اودوزماق بيتيرر. اؤيردين گله جكده بؤيوك ايستكلر ديله گتيرسين. دئيين بير ايسته يي اَله گتيرمك اوچون هر زادي الدن وئرمزلر. اونا اينانديرين گله جك بيزيمدير و بيزيم اولاجاق بو بير آغير ايستك اولسادا مني بير آناكيمي باغيشلايين. اؤيردين، او، شيرين گله جه يين بير حيصه سين مندن، سونرا بير حيصه سينده سيز حؤرمتلي معلم لردن پاي آلاجاق. اؤيردين گله جك بيزيم دير...